مرحب شهر الصوم..

عشقت تفاصيل الفانوس المصرى
الصاج ونقاشاته الفنية المميزة، وأحجامه المختلفة من كبير لمتوسط لصغير
منذ طفولتها، ومع انتشار الفوانيس ذات التصميمات الجديدة والمختلفة
بالأسواق، شعرت إسراء محمود بالغيرة خوفًا من اندثار تاريخ الفوانيس
القديمة، وفكرت فى تصميم فانوس يجمع بين التصميم المصرى والشخصيات
الكرتونية الشهيرة والمحببة للأطفال حتى ينجذبوا إليها مثلما ينجذبوا لتلك
الحديثة.

تحدثت إسراء محمود، خريجة كلية
الأداب، قسم جغرافيا تخصص مساحة وخرائط،، عن بداية
رحلتها مع تصنيع الفوانيس، حيث قالت: “أنا بشتغل من 11 سنة في الأعمال
اليدوية، وبدأت أعمل تصميمات قماش من 6 سنين تقريباً، واتجهت لتصميم
الفوانيس من سنتين، عشان أشجع الفوانيس المصرية بتصميمات تعيش العمر كله”.

وتابعت: “دمجت الشخصيات الكرتونية بتصميم الفانوس المصرى بشكله التقليدى، وعملت الفانوس من القماش، عشان يكون أمن جداً للأطفال وما
يتكسرش، وطورته بكتابة أسامى الأطفال عليه، وكمان عملته إنه بينور فى
الضلمة”.

وعن ردود أفعال الأمهات على
الفوانيس القماش، قالت إسراء: “فكرة الفانوس عجبت أمهات كتير أوى خصوصاً
إنه شغل يدوى، ومكتوب عليه أسامى ولادهم، ومصممة بشخصيات ديزنى، ولقيت إقبال كتير من الناس”.

وتابعت: “صممت فوانيس مش بس للأطفال، لا وكمان فوانيس للكبار، على شكل يونيكورن وقطة كهدية للبنات وتنفع هدايا للمخطوبين”.

وعن الصعوبات التى تواجهها
إسراء أثناء عملها، والتى تحدثت عنها قائلة: “الصعوبات اللي كانت بتقابلني
فى الشغل، هى إن الأماكن اللى بتبيع الخامات بعيدة عنى، لكن دلوقتى بقيت
متوفرة أونلاين وبقدر أشتريها”.

تحلم إسراء بأن تملك مركز
لتعليم الأعمال اليدوية، حيث قالت: “بتمنى في المستقبل يكون عندي مكان
كبير لتعليم الفنون اليدوية، وكمان تصويرها، لأن دي من الحاجات الى بهتم
بيها الفترة دى، لدرجة إنى عملت جروب على الفيس بوك لتعليم تصوير منتجات
الهاند ميد بطريقة احترافية تساعد على تسويق الشغل أونلاين”.